دوران تاپیلماز



دعاما دوش گِلِن گوْگرر گُل دِک
گُلینگ موسمی دِک دوران تاپیلماز
قهریم نینگ آتشی کؤیدورر کول دِک
کول اوْرنوُندان قایدیپ بوستان تاپیلماز

کؤنگول مسافردیر، جسد یورتدا دیر
جانیم جوْشغوُندا دیر، یورک دردده دیر
کویوم کاملده دیر، گؤزوم مردده دیر
شو شرطیمده هیچ بیر مردان تاپیلماز

کؤنگول قویغول گؤزِل الله کوْیونه
مشغول بوْلوُپ یاتما مالا، اویونا
آدمزاد میهمان دیر دنیا اوْیونه
بیر گون اوْی ایچینده میهمان تاپیلماز

غفلت ایچره غافل یاتما، توُراوِر
هر نه برسنگ، الینگ بیرله بره وِر
تیریک لیکده اوُلوم ایشین گوْره وِر
بیر گون جسد ایچره بو جان تاپیلماز

کؤنگول آولایین دییپ اوُغراسام هر یان
دعوادیر، دؤویش دیر، کأییش تاپار جان 
آیدیلماز نصیحت، اوقالماز قرآن
جانا یوقار ادب- ارکان تاپیلماز

در گاهه دعام کؤپ، نالیشیم بیحد
طالعیم زبون دیر تنیم بی قوّت
قاچغانیم کؤپلیک دیر، ایسته گیم خلوت
مانگا هیچ بیر جایِ پنهان تاپیلماز

مختومقلی، جان تقدیره تن بردی
هرکیم اؤزون ساقلا بیلسه، ایش گوْردی
هی نه یامان زات دیر، آنگلاماز دردی
جاهل لیق دردینه درمان تاپیلماز

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی