زوري‌گيتمزميش‌



احددير، صمددير اول‌ حقينگ‌ آدي‌
بير الله‌نينگ‌ گويجي‌، زوري‌ گيتمزميش‌
بولماز اونونگ‌ هرگيز ياقيني‌، يادي‌
قورولان‌ بازاري‌ شهري‌ گيتمزميش‌
 
اول‌ حقينگ‌ يانيندا يير گوهر چيقدي‌
گوزله‌دي‌ گوهره‌، سوو بولوپ‌ آقدي‌
رسول‌ اوندان‌ اوندي‌،اوزال‌ هيچ‌ يوقدي‌
رسولينگ‌ يوزونينگ‌ نوري‌ گيتمزميش‌
 
اول‌ گوهر سوو بولوپ‌، درياغا دوندي‌
اللي‌ مونگ‌ ييلدان‌ سونگ‌ بيرجه‌ قوش‌ اوندي‌
قاناتين‌ يتيريپ‌، رسولا قوندي‌
"رافع‌ كيم‌؟" ديييپ‌، قهري‌ گيتمزميش‌
 
دورت‌ توغسان‌ ييلدا اوني‌ بيلديلر
"رافع‌ الله‌" دييپ‌، رسول‌ قالديلار
نيچه‌ ييلدان‌ رسول‌ شوندا بولدولار
اول‌ نورونگ‌ شمعي‌نينگ‌ باري‌ گيتمزميش‌
 
اللي‌ مونگ‌ ييلدان‌ سونگ‌ دوو گليپ‌ دولدي‌
نيچه‌ ييللاپ‌ حقينگ‌ خذمتين‌ قيلدي‌
قاف‌ داغينينگ‌ آنگيرسيندا دوو قالدي‌
گاديگيندن‌ يامان‌ آري‌ گيتمزميش‌
 
اللي‌ مونگ‌ ييلدان‌ سونگ‌ ييلقي‌ گلديلر
اولار نيچه‌ ييللاپ‌ شوندا بولدي‌لار
اول‌ ييلقينينگ‌ مدت‌ گوني‌ دولدي‌لار
هر ييلقي‌نينگ‌ آهي‌ زاري‌ گيتمزميش‌
 
اول‌ ييلقي‌ شالارينا بوكه‌لك‌ گلدي‌
نيچه‌ ييللاپ‌ حقينگ‌ خذمتين‌ قيلدي‌
رسولنينگ‌ نوروندان‌ ير گوگي‌ سالدي‌
ير گوگونگ‌ ملا ئك‌ حوري‌ گيتمزميش‌
 
اللي‌ مونگ‌ ييلدان‌ سونگ‌ بني‌جان‌ اوتدي‌
آدم‌ آتا قيرق‌ ييل‌ پالچيقدا ياتدي‌
اوندان‌ سونگ‌ شيث‌ گليپ‌ لشكرين‌ توتدي‌
دنيا گلن‌ قايديپ‌ ديري‌ گلمزميش‌
 
دورت‌ توغسان‌ مونگ‌ اللي‌ آلتي‌ دنيانينگ‌ باري‌
ايكي‌ مونگ‌ ايكي‌ يوز رسولدان‌ باري‌
مختومقلي‌، گورونمز حقينگ‌ ديداري‌
گورن‌ قولا حق‌ ديداري‌ گيتمزميش‌

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی