ساناگلدينگ‌



آدم‌ اوغلي‌، اصل‌ ذاتينگ‌
بير اوووچدان‌ سانا گلدينگ‌
اوت‌ بيله‌ يلدن‌، توپراقدان‌
قط‌ره‌سيدان‌ قانا گلدينگ‌
 
ياتاردينگ‌ قارانگقي‌ جايدا
نه‌ گون‌ گورمه‌دي‌، نه‌ آي‌ - دا
اون‌ دورت‌ گون‌ بيله‌ دورت‌ آيدا
حق‌ امر اتدي‌، جانا گلدينگ‌
 
گور، نيچيك‌ بولدي‌ قدرتدا
رزق‌ بردي‌ داتلي‌ شربتده‌
دوقوز آي‌، دوقوز ساعتدا
اينيپ‌، بول‌ جهانا گلدينگ‌
 
بيوفاغا گلدينگ‌ اينه‌
سويت‌ بره‌ بسله‌دي‌ انه‌
تيمار گرك‌ جانا-تنه‌
كوينك‌ بيله‌ دونا گلدينگ‌
 
بيردن‌ ايكا گيتدي‌ ياشينگ‌
ييغلاماقدير سنينگ‌ ايشينگ‌
اوچ‌ ياشينگدا چيقدي‌ ديشينگ‌
سويتدن‌ اوتوپ‌، نانا گلدينگ‌
 
دورلي‌ ديل‌ آچيلدي‌ دوردن‌
پروايينگ‌ يوق‌ خير و شردن‌
باش‌-آلتي‌ ياشينگدا زردن‌
گييپ‌، خوب‌ اركانا گلدينگ‌
 
يدي‌ ياشدا دوشر ديشينگ‌
علم‌، مكتب‌ بولدي‌ ايشينگ‌
سكيزينگده‌ يازدير قيشينگ‌
دوقوز باشلاپ‌، اونا گلدينگ‌
 
اون‌ ايكيده‌ گوللر بيلن‌
گزدينگ‌ شيرين‌ تيللر بيلن‌
اون‌ اوچده‌ بلبللر بيلن‌
سيري‌ گلستانا گلدينگ‌
 
اثر اوردي‌ اون‌ دورت‌ ياشدا
آرزومانينگ‌ قلم‌ قاشدا
تر محبوب‌ قوچدونگ‌ اون‌ باشده‌
عشق‌ ايچره‌ مستانا گلدينگ‌
 
ييگريمينگه‌ باردينگ‌ جوشوپ‌
ييگريم‌ باشده‌ قايناپ‌ داشيپ‌
اوتوز ياشلاردا سووه‌شيپ‌
شير كيمين‌ ميدانا گلدينگ‌
 
اوتوز باشده‌ سرمست‌ بولوپ‌
يوووردينگ‌ دين‌ قيليجين‌ چاليپ‌
قيرقينگدا دورت‌ كاسانگ‌ دولوپ‌
گچيپ‌، گور (سن‌) سانا گلدينگ‌
 
قيرق‌ باشده‌ قوردونگ‌ دستاني‌
الليده‌ باستان‌ آستاني‌
اللي‌ باشده‌ تابستاني‌
گويا زمستانا گلدينگ‌
 
آلتميشده‌ قيش‌ اويه‌ گيردينگ‌
آلتميش‌ باشده‌ جاندان‌ ايردينگ‌
يتميشده‌ غونچا گول‌ تيردينگ‌
توپلي‌ زمستانا گلدينگ‌
 
يتميش‌ باشده‌ آه‌ چكيلر
سگسنده‌ ديشينگ‌ دوكولر
سگسن‌ باشده‌ بيل‌ بوكولر
كيريش‌سيز كمانا گلدينگ‌
 
ساندان‌ چيقدينگ‌ توغسان‌ ياشدا
ايمان‌ ديله‌ توغسان‌ باشده‌
مختومقلي‌، سن‌ يوز ياشدا
بير بللي‌ مكانا گلدينگ‌

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی