شاه‌لارقالمازلار



غم‌ چكمه‌، غريب‌ آدم‌
بگ‌لر - شاه‌لار قالمازلار!
عظ‌يم‌ - عظ‌يم‌ شهرلر
آق‌ اوتاغ‌لار قالمازلار
 
قالسا سوزدن‌ قيزيل‌ ديل‌
جان‌ جوهردير، تن‌ بير كول‌
هزار مقام‌لي‌ بلبل‌
بييك‌ داغ‌لار قالمازلار
 
شوني‌ كسيپ‌دير عقليم‌
ييقيلار يدي‌ اقليم‌
ير بولار بوكليم‌ - بوكليم‌
ارير، داغ‌لار قالمازلار
 
حقدان‌ يتيشسه‌ فرمان‌
نه‌ چاره‌ بار، نه‌ درمان‌
آسمان‌، گون‌ و آي‌ لرزان‌
هم‌ ييلديزلار قالمازلار
 
نه‌ ير قالار، نه‌ يورت‌لار
نه‌ ترك‌ قالار، نه‌ كردلر
نه‌ قوش‌ قالار، نه‌ قورت‌لار
پرنده‌لر قالمازلار
 
نه‌ گرد قالار، نه‌ گردان‌
نه‌ مرد قالار، نه‌ مردان‌
فيل‌، پشه‌ و كرگدن‌
درنده‌لر قالمازلار
 
مختومقلي‌، ياش‌ سورن‌
آغير هنگام‌لار قوران‌
لنبر - لنبر موج‌ اوران‌
شول‌ دريالار قالمازلار

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی