قالار،يارانلار



گل‌، كونگلوم‌، عزم‌ ايله‌ باقي‌ دنيايه
كيم‌ فاني‌ دنياده‌ قالار، يارانلار
بو دنيا ملكينده‌ ملك‌ مولايا
نه‌ كافرلر، منكر بولار، يارانلار
 
كيم‌ قالار اولمه‌ين‌ اجل‌ يتن‌سونگ‌
قويمازلار گزماگه‌ ياقا توتان‌سونگ‌
عيسي‌ بيلن‌ مهدي‌ گليپ‌، اوتن‌سونگ‌
اسرافيل‌ بير صيحه‌ قيلار، يارانلار
 
حقينگ‌ قدرتينه‌ باقسين‌ گوزلرينگ‌
يوزلري‌ چول‌ قالار داغينگ‌، دوزلرينگ‌
اوچارينگ‌، يورارينگ‌، تيلي‌ سوزلارينگ‌
عزراييل‌ جانيني‌ آلار، يارانلار
 
عزراييل‌ قهر ايله‌ اينر شيط‌انا
شيط‌ان‌ عاجزلانيپ‌، قاچار هر يانا
بيلر كي‌، غوتولماز قاچيپ‌ بير يانا
سرانديب‌ده‌ باريپ‌ اولر، يارانلار
 
اول‌ گونونگ‌ حسابي‌ گچر فردايا
آسماني‌ سست‌ ايلار، زميني‌ ضايا
غضب‌ دونون‌ گييپ‌ گلر دريايا
دريالار قورقوبان‌، قورار، يارانلار
 
ييقيلار، يوق‌ بولار داغلار، سارايلار
ييلديزلار دوكولر، دولار بو جايلار
گون‌ شعله‌سيز دوغار، توتولار جايلار
داغلار قورشون‌ كيمين‌ ارير، يارانلار
 
آدمينگ‌ نفسي‌ دك‌ ياغدير باراني‌
اوت‌ كيمين‌ جيغلاديپ‌، چاقار انساني‌
عزراييل‌ هم‌ برر امانت‌ جاني‌
دورت‌ فرشته‌ تازه‌ ديره‌لر، يارانلار
 
اسرافيل‌ صور چالار چيغيريپ‌ هر يان‌
يوق‌ بولان‌ جسدلر، آيريليشان‌ جان‌
كسيلن‌ دامارلار، قوري‌ استخوان‌
آسغيرشيپ‌ - آسغيرشيپ‌، تورار يارانلار
 
بير ياندان‌ سوراغ‌ بار، بير ياندان‌ جواب‌
بير ياندان‌ آتش‌ بار، بير ياندان‌ عذاب‌
بير ياندان‌ ميزان‌ بار، بير ياندان‌ حساب‌
ادن‌ ايشينگ‌ بير-بير سورالار، يارانلار
 
دينه‌ گواه‌ دييرلر فرضي‌، سنتي‌
يتميش‌ اوچ‌ فرقه‌ دير، گورونگ‌، ملتي‌
اون‌ ايكي‌ گروه‌ بولوپ‌ رسول‌ امتي‌
هر بيري‌ بير جنسدا سورلر، يارانلار
 
قولسوز غوپار غونگشا يامان‌ سانانلار
دونگوز بولوپ‌ سورلر نماز غويانلار
زكاتسيزينگ‌ قارني‌ ييلان‌، ايچيانلار
دولوبان‌، داغ‌ كيمين‌ بولار، يارانلار
 
ارته‌ گورنر بو گون‌ گيزله‌نن‌ سرلار
يالاندان‌ گواهليك‌ برن‌ يسرلر
ينگسه‌سيندن‌ بوغازنا دك‌ كسرلر
اودلي‌ گرزي‌ بيله‌ اورار، يارانلار
 
جبر ادن‌ حاكم‌لر بولارلار گوزسيز
گوروپ‌، دييمه‌ينلر قالارلار تيلسيز
زناچي‌لار باشي‌ قارنيندا، قولسيز
قارني‌ داغ‌ دك‌ اوتدان‌ دولار، يارانلار
 
بو دنياده‌ "منم‌ - منم‌" دييه‌نه‌
جبر الين‌ خلق‌ اوستونه‌ قويانا
بير اوت‌ بولار يتيم‌ مالين‌ اييه‌نه‌
روسياه‌- شرمنده‌ بولار، يارانلار
 
چاقيرخورونگ‌ گوزي‌، بولماز اورنوندا
ديشي‌ سيغير شاخ‌ دك‌ دورار بورنوندا
دوداق‌ سيناسيندا، تيلي‌ قارنيندا
اييديگي‌ آغزيندان‌ گلر، يارانلار
 
آتا- انه‌ آغيردانينگ‌ گونلري‌
ايچي‌- داشي‌ اوتدان‌ بولار دونلاري‌
خلقا رسوا، آلا بولار تنلري‌
سوو يرينه‌ زهر بررلر، يارانلار
 
اون‌ ايكينجي‌ گروه‌، گورونگ‌لر، نادر
مسجد بوغرا بولوپ‌، مونوبان‌ گيدر
اماملاري‌ سورر، موذن‌ آيدار
يوزلري‌ آي‌ كيمين‌ بولار، يارانلار
 
بولار ييلديريم‌ دك‌ يالپيلداپ‌ گچر
يا هم‌ يووروك‌ آط‌ دك‌ پر باغلاپ‌ اوچار
اگين‌ يتميش‌ دونلي‌ حور قيزين‌ قوچار
حسرت‌ گيديپ‌، عشرت‌ گلر، يارانلار
 
كلامدا گوردوگين‌ سوزلار تيليميز
آخر اجل‌ اوستونده‌دير يولوميز
مختومقلي‌ آيدار، بيزينگ‌ حاليميز
يا رب‌، اول‌ گون‌ نيچيك‌ بولار، يارانلار

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی