قارري‌ليق‌ديريارانلار



ييگيت‌ليك‌نينگ‌ زوري‌ گيتدي‌ بيليمدن‌
درد ياماني‌ قارري‌ليق‌دير يارانلار
علاجي‌ يوق‌ اونونگ‌ غيري‌ اولومدن‌
درد ياماني‌ قارري‌ليق‌دير يارانلار
 
خسته‌لر قوتولار، قارري‌ قوتولماز
بو يرده‌ هيچ‌ كيمدن‌ چاره‌ يتيلمز
كونگول‌ قوشي‌ اوچار گيدر توتولماز
درد ياماني‌ قارري‌ليق‌دير يارانلار
 
هيچ‌ ط‌عام‌ اييماگه‌ ديش‌لري‌ باتماز
اوغول‌ قيز سوزونه‌ هيچ‌ قولاق‌ آسماز
اوزاقدان‌ گوزله‌سه‌ گوزلري‌ كسمز
درد ياماني‌ قارري‌ليق‌دير يارانلار
 
يتميشنگ‌ اويونه‌ گيرنده‌ ياشي‌
ايرانيپ‌ بير يرده‌ دورماندير باشي‌
چورك‌ چينا بيلمز تالخان‌ دير آشي‌
درد ياماني‌ قارري‌ليق‌دير يارانلار
 
دييسنگ‌ سوز اشيتمز قولاق‌ كر بولار
اولتوريپ‌ تورماغي‌ دردسر بولار
سويك‌لري‌ سيزلاپ‌ دربدر بولار
درد ياماني‌ قارري‌ليق‌دير يارانلار
 
آغزيني‌ گوزله‌سنگ‌ بير ديشي‌ بولماز
دوشك‌-ياسسيق‌ بيله‌هيچ‌ ايشي‌ بولماز
يانيندا قدردان‌ دنگ‌-دوشي‌ بولماز
درد ياماني‌ قارري‌ليق‌دير يارانلار
 
اوغول‌-قيز، گلينه‌ ييگرنجي‌ بولار
اولار بيله‌ مدام‌ گورگنجي‌ بولار
ييرتيق‌ ايريك‌ دوشك‌ اورتونجي‌ بولار
درد ياماني‌ قارري‌ليق‌دير يارانلار
 
گيتدي‌ تمام‌ قدر بيلن‌ دنگ‌-دوشونگ‌
ايندي‌ ساغليق‌ اوتدي‌ درددير يولداشينگ‌
بارديقچا ييل‌-ييلدان‌ موج‌ اورار قيشينگ‌
درد ياماني‌ قارري‌ليق‌دير يارانلار
 
قالان‌ قاچان‌ بولسا اونگونه‌ بييرلر
ايسسي‌ ييلي‌ بولماز "شوني‌ ايي‌" دييرلر
هر كيمه‌ سوز اورسا "گپله‌مه‌" دييرلر
درد ياماني‌ قارري‌ليق‌دير يارانلار
 
حالي‌ تنگ‌ بولار هر نيچيك‌ ط‌عنه‌
ييگرنتگي‌ سوز قايتار دونوپ‌ هر يانا
همه‌ سوز بير يانا، بو سوز بير يانا
درد ياماني‌ قارري‌ليق‌دير يارانلار
 
تنده‌ قوات‌ قالماز، يوزونگده‌ گوركونگ‌
اولتوريپ‌-تورماغا يتيشمز اركينگ‌
آشي‌ ايچيپ‌ بولماز سونگرا اوركينگ‌
درد ياماني‌ قارري‌ليق‌دير يارانلار
 
مختومقلي‌ دوستلار قارريمانگ‌ بتر
يتميشينگ‌ - سگسنينگ‌ آراسي‌ يتر
اوزي‌ بيلمز نادان‌ يوويلاپ‌ اوتر
درد ياماني‌ قارري‌ليق‌دير يارانلار

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی