كوپ‌جان‌گچيپ‌دير



نادان‌ كونگلوم‌، اولوم‌ اوچين‌ غم‌ اييمه‌
سندن‌ اول‌ گليپ‌، كوپ‌ جان‌ گچيپ‌دير
يالان‌ دنيا پايان‌ برندير كيمه‌
آنچا شعرلار، آنچا يامان‌ گچيپ‌دير
 
قاني‌ آدم‌ آتا، حوا انه‌سي‌
قاني‌ دين‌ باباميز ـ خليل‌ الله‌سي‌
قاني‌ موسي‌ كليم‌، معجز عصاسي‌
گاهي‌ كوپروك‌، گاهي‌ ييلان‌گچيپ‌دير
 
اسكندر، سليمان‌ پادشاه‌ بولدي‌
خذمتيندا دوو پري‌لر جم‌ بولدي‌
نه‌ غلغله‌ هم‌ ديوان‌لار قورولدي‌
آنچا شاه‌ صاحبقران‌ گچيپ‌دير
 
عيسي‌ گچدي‌، دمدن‌ جان‌ بريپ‌ مرده‌
 اگر آچسا يوسف‌ يوزوندن‌ پرده‌
گورن‌ بيهوش‌ بولوپ‌، ياتار شول‌ يرده‌
شيله‌ حسني‌ ماه‌ تابان‌ گچيپ‌دير
 
آن‌ حضرت‌ حق‌، رسول‌ معجزه‌ آشدي‌
آسمانلار دربدر قاپيسين‌ آچدي‌
"قاب‌ قوسين‌" باريپ‌، حقا قاويشدي‌
شول‌ سرور ايكي‌ جهان‌ گچيپ‌دير
 
ابابكر گچدي‌ رياضت‌ بيلن‌
عمر پادشاه‌ بولدي‌ عدالت‌ بيلن‌
عثمان‌ گچدي‌ قرآن‌ تلاوت‌ بيلن‌
دين‌ قيليجين‌ چاليپ‌،آرسلان‌گچيپ‌دير
 
حسن‌ حسين‌، دينينگ‌ انوري‌، ماهي‌
قاني‌ فاط‌مه‌ زهرا، حورلرينگ‌ شاهي‌
قدرت‌ بيلن‌ دوران‌ نور الهي‌
شيله‌ معجزات‌لار موندان‌ گچيپ‌دير
 
گورونگ‌، نه‌ جنانلار عشقه‌ اولاشدي‌
عمريني‌ ضايالاپ‌، خارغا بولاشدي‌
آه‌ اوروپ‌، آيراليق‌ درديندن‌ گچدي‌
دلموراـ دلمورا، گريان‌ گچيپ‌دير
 
نه‌ گوزل‌لر گچدي‌ حسني‌ حور يالي‌
گويا اون‌ دورت‌ دولان‌ آي‌ دير مثالي‌
نه‌ عاشقلار يتدي‌ افتاده‌ حالي‌
آلارينگ‌ عشقيندا حيران‌ گچيپ‌دير
 
نه‌ اولكه‌لر قالدي‌ ويران‌ بولوشيپ‌
ايلي‌ خلقي‌ زير-زبران‌ بولوشيپ‌
بايقوشلار قوقلاشيپ‌،ايت‌لر اويروشيپ‌
نه‌ شارلار قاليپ‌دير، جيران‌ گچيپ‌دير
 
قاني‌ حيله‌ بيلن‌ ماللار ييغنانلار
قاني‌ اويلر دولي‌ سيم‌ بيله‌ زرلر
قاني‌ صنديق‌، حقه‌، لعل‌ و گوهرلر
همه‌ ساليپ‌، آشكار، نهان‌ گچيپ‌دير
 
نه‌ ياغشي‌لار گچيپ‌، صحبت‌لر توتدي‌
نه‌ دورانلار گليپ‌، خوش‌ بولوپ‌ اوتدي‌
عمرينگ‌ اوتدي‌، ياشينگ‌ يتدي‌، حال‌ گيتدي‌
مختومقلي‌، سندن‌ دوران‌ گچيپ‌دير

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی