گوزله‌مه‌ين‌بولارمي‌؟



بير كاكيليك‌ آلديرسه‌ ذريه‌ باله‌سين‌
سايراي‌ - سايراي‌، گوزله‌مه‌يين‌ بولار مي‌؟
بير بلبل‌ ييتيرسه‌ قيزيل‌ لاله‌سين‌
حسرتيندان‌ سوزله‌مه‌يين‌ بولار مي‌؟
 
كره‌سي‌ اليندن‌ گيتسه‌ اشه‌گينگ‌
تلموريپ‌ دورت‌ يانا، گوزلار اوشاغين‌
آق‌ مايه‌ آلديرسه‌ الدن‌ كوشه‌گين‌
باغرين‌ بوزيپ‌، بوزلاماين‌ بولار مي‌؟
 
بير جرن‌ آلديرسه‌ الدن‌ آولاغين‌
باله‌ سسين‌ دينگلاپ‌، سالار قولاغين‌
دوكه‌ - دوكه‌ گوزياشي‌نينگ‌ بولاغين‌
مالاي‌ - مالاي‌ ايزلامايين‌ بولار مي‌؟
 
آغساغينگ‌ اليندن‌ آلسانگ‌ آغاجين‌
يامان‌ درده‌ دوشر، تاپماز علاجين‌
بير گويچلي‌ دوشمانه‌ دوشسه‌ مكه‌جين‌
جوجوغيني‌ گيزله‌مه‌يين‌ بولار مي‌؟
 
آيراليغا آدم‌ اوغلي‌ نيله‌سين‌
كيم‌ قالار گورمه‌ين‌ اجل‌ حيله‌سين‌
مختومقلي‌، حيوان‌ بيلسه‌ باله‌سين‌
انسان‌ باغرين‌ دوزلامايين‌ بولار مي‌؟

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی