گوزل‌سن



گون‌ خنجري‌ گوكدن‌ يره‌ ايننده‌
گونه‌ قارشي‌ دوغان‌ آيي‌، گوزل‌ سن‌!
اوستا جعفر ايشي‌، سنجاب‌ جبه‌سي‌
اصفهاندا قورلان‌ يايي‌، گوزل‌ سن‌!
 
ساچ‌باغينگ‌ اوجونينگ‌ سيم‌دير ايشمه‌سي‌
اوستونگدن‌ يول‌ دوشسه‌، قين‌دير آشماسي‌
آغزينگ‌ آب‌ حيات‌، زمزم‌ چشمه‌سي‌
عين‌ الباقي‌ سوونينگ‌ لايي‌، گوزل‌ سن‌!
 
قيزيل‌ دييسم‌ ـ قيزيل‌، آل‌ دييسم‌ ـ آل‌ سن‌
هندوستاندا ـ شكر، بولغاردا - بال‌ سن‌
عشق‌ بيلن‌ آچيلان‌ بير تازه‌ گل‌ سن‌
يوسف‌ - زليخانينگ‌ تايي‌، گوزل‌ سن‌!
 
هر كيم‌ گويچ‌لي‌ بولسا، اونگا "پير" دييرلر
"دردلي‌ قولونگ‌ درمانيني‌ بيير" دييرلر
"قاوينينگ‌ ياغشي‌سين‌ شاغال‌ ايير"دييرلر
اقبال‌لي‌ بندانينگ‌ پايي‌، گوزل‌ سن‌!
 
آوازانگ‌ چين‌ - ماچين‌، داغلار آشاسي‌
سني‌ گورن‌لرينگ‌ عقلي‌ چاشاسي‌
هندوستانينگ‌ رنگ‌لي‌ قيزيل‌ شيشه‌سي‌
سورايي‌ چيليمنينگ‌ نايي‌، گوزل‌ سن‌!
 
مختومقلي‌ خلقدان‌ سيرين‌ گيزله‌سه‌
ديشيني‌ اوشادينگ‌، يالان‌ سوزله‌سه‌
اولدا، آخردا ايام‌ گوزله‌سه‌
غريب‌ بيچارانينگ‌ پايي‌، گوزل‌ سن‌!

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی