يتمه‌يين‌قالماز



اخلاص‌ بيله‌ بير كامله‌ قول‌ برگن‌
يتر بير منزله‌ يتمه‌يين‌ قالماز
دريا ايچره‌ يوزگن‌ چوللرده‌ يورگن‌
دم‌ حسابين‌ توكل‌ اتمه‌يين‌ قالماز
 
چونكي‌ گلدينگ‌ بو يالانچي‌ جهانا
آياغينگ‌ قاراماي‌، باقدينگ‌ آسمانه‌
فلك‌ بازاريندا اييدگينگ‌ نانه‌
آدم‌ اوغلي‌ عمرين‌ ساتمايين‌ قالماز
 
همراهيم‌ يوق‌، باريپ‌ سريم‌ آچارغا
درديم‌ توغتاشارغا، اودوم‌ اوچيرگه‌
دنيا بير منزل‌دير گليپ‌ گچرگه‌
بو منزيله‌ گلگن‌، گيتمه‌يين‌ قالماز
 
فلك‌ تماشاكار آسمانا چيقيپ‌
آدمزاد مال‌ اوچين‌ يوره‌گين‌ ياقيپ‌
دنيا آژدارهاسي‌ دم‌ بيله‌ چكيپ‌
جمله‌ جاندار تخمين‌ يووتمايين‌ قالماز
 
مختومقلي‌، بو دنيانينگ‌ دولتين‌
گلن‌ گورر - چكر اولوم‌ محنتين‌
مدام‌ يورودرلر اجل‌ شربتين‌
بو شربت‌دن‌ هيچ‌ كيم‌ داتمايين‌ قالماز

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی