بارساگركدير


 مايل‌ اولمانگ‌ بو دنياگه‌، دوستلاريم‌

بارچا موندان‌ اونگا بارسا گركدير

اول‌ آمان‌، آخر ايمان‌ ايستارم‌

 حق‌ قولنونگ‌ مرادين‌ برسه‌ گركدير

 

بير گون‌ قاف‌ داغيندا خر دجال‌ چيقار

بزاپ‌، اشگينه‌ زمرد داقار

يا مهدي‌، اونگوندن‌ توغوني‌ ديكر

سووه‌شيپ‌، دجالي‌ غيرسا گركدير

 

اوشول‌ داغدا دجال‌ نربانه‌ دونر

يانگي‌ باشدان‌ دينينگ‌ چراغي‌ يانار

مدينه‌ده‌ عيسي‌ آسماندان‌ اينر

صف‌ قوروپ‌، ميداندا دورسا گركدير

 

آسماندان‌ جبراييل‌ اولارا گلر

 مهدي‌ بيلن‌ عيسي‌ جهاني‌ آلار

مدينه‌ شهرينده‌ پادشاه‌ بولار

قيرق‌ ييللاپ‌ دوراني‌ سورسه‌ گركدير

 

قيرق‌ ييلدان‌ سونگ‌ اولار قيلارلار سفر

گياه‌لار قوراپ‌ هم‌ دريالار كپار

ياجوج‌، ماجوج‌ دييرلر، معجزه‌ قوپار

 مغربدان‌ مشريقا يورسه‌ گركدير

 

فاش‌ ايلارم‌، بير سوزوم‌ بار دييماگه‌

تيللريم‌ اوورولمز آني‌ آيماغا

جهان‌ قوريپ‌، نارسه‌ قالماز اييماگه‌ 

 بير بيرينينگ‌ قانين‌ سورسا گركدير

 

ياغمير ياغار، يرينگ‌ يوزون‌ سوو آلار

ويران‌ بولوپ‌، بييك‌ داغلار اوورولر

حيوان‌، انسان‌ قالماز، بارچاسي‌ اولر

زمانينگ‌ آخري‌ بولسا گركدير

 

عزراييل‌ اوز جانين‌ اوزي‌ آلارميش‌

بارچا گيديپ‌، حقينگ‌ اوزي‌ قالارميش‌

بو جهانا دورت‌ پريشته‌ گلرميش‌

اسرافيل‌ صوروني‌ چالسا گركدير

 

گوگه‌ريبان‌، ير يوزونه‌ چيقارلار

منافق‌، ظ‌المي‌ شول‌ گون‌ ياقارلار

حساب‌ ايلاپ‌، خير-شرينگ‌ چكرلر

يا ملك‌ ميزانين‌ قورسا گركدير

 

بو فسادلار ير يوزونه‌ گلنده‌

 منكر ييغلاپ‌، مومن‌ باري‌ گولنده‌

قبر ياريليپ‌، تانگلا محشر بولاندا

رسول‌ "امتيم‌" دييپ‌ تورسا گركدير

 

بارچاني‌ يارادان‌ شول‌ گوزل‌ الله‌

 دييه‌ورينگ‌ "لا اله‌ الا الله‌"

گناهكار امتين‌ حق‌ رسول‌ الله‌

صراط‌دان‌ باشلاييپ‌ يورسه‌ گركدير

 

امت‌ بولان‌، بيلگيل‌، صراط‌دان‌ گچر

جنت‌ ايچره‌ كوثر شرابين‌ ايچر

آلدانمانگ‌، صوفيلار، پيرلرنگيز قاچار

"داد!" ديييپ‌، رسولغا بارسا گركدير

 

مختومقلي‌، سردن‌ گيتمز دومانيم‌

من‌ حقا عاشقام‌، يوقدور گمانيم‌

اول‌ دمده‌ آمان‌، آخر ايمانيم‌

روزي‌ قيليپ‌، بيزه‌ برسه‌ گركدير

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی