بيربيان‌گلر


داب الارض‌ آدلي‌ دجال‌ سونگوندان

مروه‌دن‌، صفادان‌ بير بيان‌ گلر

يدي‌ گوندن‌ سونگرا آنينگ‌ جنگيندن

اوچ‌ گوندن‌ عالمه‌ بو نشان‌ گلر

 

يوزي‌ آدم‌، گون‌ دك‌ آلني‌نينگ‌ آغي

مثل‌ دووه‌ منگزار الي‌، آياغي‌

قوچ‌ دملي‌، قوش‌ تن‌لي‌، قالقان‌ قولاغي

دپه‌سي‌ اوستونده‌ دورت‌ قيران‌ گلر

 

آز قالار كيم‌ شاخي‌ گوكگه‌ يتماگه

بير هفته‌چه‌ فرصت‌ تاپار ياتماغا

جهان‌ ييغليپ‌، تماشاسين‌ اتماگه

ياغشي‌ يامان‌ بارچه‌ مسلمان‌ گلر

 

قاچيپ‌ آندان‌، هيچ‌ كيم‌ تاپماز خلاصي

مومن‌لر خوش‌ بولار هول‌ ادر عاصي‌

ساغ‌ الينده‌ باردير موسي‌ عصاسي‌

سول‌ الينده‌ مهر سليمان‌ گلر

 

نيچه‌سينه‌ مهر سليمان‌ سورر

نيچه‌سينه‌ موسي‌ عصاسين‌ اورار

خلق‌ ياري‌ آق‌ بولار، بير نصفي‌ قارار

قارا يوزلي‌ بللي‌ بي‌ايمان‌ گلر

 

خور قالماز آلانلار بيلندن‌ بيليك

دوستي‌ دوشمان‌ ادر بولسا بدقيليق‌

آق‌ اوچماخ‌ليق‌ دييرلر، قارا - تاموغليق

دنيانينگ‌ سونگوندان‌ شو زمان‌ گلر

 

بولاردان‌سونگ‌ دينگلانگ‌ عاشق‌نينگ‌سوزون

بيليپ‌ بولماز گون‌، آي‌، گيجه‌، ييلديزين‌

قيرق‌ گون‌ قارا توتون‌ عالمينگ‌ يوزون

يري‌، گوگي‌ باسيپ‌، بوز دومان‌ گلر

 

جانور يوق‌ بولار، خلق‌ اوندان‌ دينار

اوغول‌، قيز آز دورار، خلق‌ اوجي‌ سينار

آدم‌ سايي‌ اون‌ ملك‌ آسماندان‌ اينر

آغلاشيپ‌، هر يردن‌ صد فغان‌ گلر

 

مختومقلي‌ اويار كلام‌ سوزونه

ير و گوك‌ توتاشار داغلار دوزونه‌

اسرافيل‌ صور چالار يرينگ‌ يوزونه‌

اميدسيز خاك‌ تنه‌ تازه‌ جان‌ گلر

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی