جان ایچینده


فکر قیلدیم یر-گؤگی

بی عقل جان ایچینده

گؤردوم، جان هم ((الله)) دییر

ات، سینگیر، قان ایچینده



گیدر یوْلوُنگ بیلمه سنگ 

دوْغری یوْلا گلمه سنگ 

حقی یادا سالماسانگ

قالدینگ آرمان ایچینده



یردن چیقان نباتلار

قیزیل گل لر، گؤک اوتلار

غافل آدم، بو زاتلار

کُلّی فرمان ایچینده



نفسینگ آیدار: ((جوش بوْلسام 

گرچک لره دوُش بوْلسام

اییسم- ایچسم خوش بوْلسام

یاتسام الوان ایچینده))



کؤنگول، سن بیر بازار سن

هر ایشه بیر قیزار سن

دویرسِم دیییپ گزر سن

جُرم و عصیان ایچینده



یاییلار قانات- پرلر

خوب آچیلار دفترلر

بؤلِک-بؤلِک کفترلر

((هو!)) دییر خرمن ایچینده



بلبل آیدار: ((کشیگِم

بهارا گؤزله شیگِم

گلزار اوچین عاشقام

باغ بستان ایچینده))



عاشق آیدار: ((الا الله))

قارلاواچ ((الحمد لله))

لک لک دییر: ((قُل هو الله))

حنّان- منّان ایچینده))



یار قانات دییر: (( یامولا

سالدینگ منی بو یوْلا

برمه، آی، گونه، یله

ساقلا پنهان ایچینده))

عنقا آیدار: ((یوْلچیام))

هدهد آیدار: (( ایلچیِم

سلیمانا سها وچیام

یالان جهان ایچینده))



بزگِک قالیپ حیرانا

گلدیم باقیپ هریانا

زنبور چیقیپ سیرانا

گزر دوران ایچینده



دورنا آیدار: ((اوُچار من 

بغداد سوُوین ایچرمن

قیش هندوستان گؤچر من

لاله زاران ایچینده))



بایقوش آیدار: (( دردیم بار

تسبیحم بار وردیم بار

ویرانه دا یوُردوُم بار

زاری-گریان ایچینده



اسحاق آیدار: فقیر من

قوُللوُغیمغا حقیر من

حق یادینا اوقیر من

شام شبستان ایچینده



موسیجه دییر: ((گیدِر من 

گلدیم، بیلدیم- اؤتر من 

اوچ آغاچنی چاتار من

قوُزلاپ، ویران ایچینده))



لاچین آیدار: ((هوشومدان

مست بوْلدوُم اؤز جوْشوُمدان

قالدیم تانگری ایشیمدن

بندی زندان ایچینده))



توُراچ دیلی ثنادا

اؤردک دیلی دعادا

غاز قارقیلداپ هوادا

گؤزی عمان ایچینده



قمری لار آواز بیلن 

طاووسی ایشی ناز بیلن 

ققنوس قوشی ساز بیلن 

شول هندوستان ایچینده



طوطی قوشلار رازلاشیب

حق امرینی گؤزله شیب 

آدم دیلین سؤزله شیپ

گزر انسان ایچینده



تورغای هزار ایأم دییر 

عجایب خوش ایّام دییر

دوزخ اوْدی حرام دییر

آخرزمان ایچینده



بیلمز فلکینگ فرجین

یِلدیر، توتموش گؤک بوُرچین

بیر بؤله جیک گؤگرچین

((هو!)) دییر خرمن ایچینده



کییک آیدار: ((آغلار من 

حقه صدقیم باغلار من 

بالالارمینگ دردیندن

یوره گیم قان ایچینده



قوُرت آیدار کی: (( اوزر من 

نیردن قیلسام گُذر من 

رزقیم آراپ گزر من 

چؤل- بیابان ایچینده))



آط آیدار: اصلیم زوردیر

موُنچا قیمْاتیم باردیر

اوستومه مونن أردیر

داغلاردا داش ایچینده



یابی آیدار: ((من گنده

اوستومه مونن بنده

عذابیم کؤپدور گونده

اؤزوم خدمت ایچینده



اشک آیدار: ((اصلیم داش

خدمت بیلن باغریم باش

سامان تاپسام، کؤنگلوم خوش

مدام آیاز ایچینده



سیغیر آیدار: (( من باشدیم

یتمز علاجیم- کوشتیم

قؤیروُق چوْممالدیپ قاچدیم

چیبین- چیرکه ی ایچینده))



دویه آیدار: (( اوتلار من

اوتلان یریم یادلار من 

المداما بوْتلار من

سازاق- سلین ایچینده



یدی یر بوْلموُش بنا

هر زات اوقیر بیر ثنا

اوتلار هم دییر: ((ربّنا))

نوروز- باران ایچینده



کؤنگول آیدار گداغا

سحر توُرسام صداغا

نالیش قیلسام خداغا

بوْلسام ایمان ایچینده



قیامت گون الینگدن 

خبر بییرلر حالینگدان

قایتغیل یامان یوْلوُنگدان

گؤردوم فُرقان ایچینده



امیدلی بول یوسف دک

صبرلی بول ایوب دک

گر اوُغراشسانگ یعقوب دک

درده کنعان ایچینده





نفسیم آیدار: (( خوش ایله

جامی جرعه جوش ایله

کرمینگه دوُش ایله

تانگلا دیوان ایچینده



مختومقلی ، اؤزونگه 

باق یاش گتیر گؤزونگه

عیبلا شمانگ سؤزومه

یار و یاران ایچینده 

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی