جم‌بولوپ‌


چالينديقچا جهان‌ چيرچيغي‌ آرتار

   قاچان‌ كونگول‌ قرار تاپار جم‌ بولوپ‌

آخرت‌ ايشينگ‌ گور، موندان‌ باش‌ قوتار 

  دنياني‌ كيم‌ توتدي‌؟ ــ اوتر گم‌ بولوپ‌

 

ديرناق‌ بيله‌ داغلار ديلن‌ بني‌ جان‌

سووا، يله‌ حكم‌ ايله‌گن‌ سليمان‌

قاني‌ اول‌ اسكندر، رستم‌ پهلوان‌

سن‌ دنياني‌ توتاجاق‌ سن‌ كيم‌ بولوپ‌

 

بي‌نورباتسيز دورانيندان‌ ـ داد گونونگ‌

اگلنجي‌ يوق‌، بوكدنجي‌ يوق‌ ـ باد گونونگ‌

اوغلانليقدا، ييگيتليك‌ده‌ ـ شاد گونونگ‌

قارريليقدا قايديپ‌ باسار غم‌ بولوپ‌

 

معلوم‌ ايشدير قايداجاق‌ دير گلن‌لر

بارار يرينگ‌ ايشين‌ گوردي‌ بيلن‌لر

قايغي‌سيز ياتانلار غافل‌ بولان‌لار

واحسرتا بوش‌ گيتدي‌لر كم‌ بولوپ‌

 

تاپا بيلسنگ‌ حقيقتينگ‌ مرديني‌

گوزينگه‌ توتيا قيلغين‌ گرديني‌

قلزم‌ گناهي‌نينگ‌ ترينگ‌ درديني‌

چين‌ توبه‌ قوريدار آنگا ام‌ بولوپ‌

 

اول‌ اوزينگ‌ اخلاصينگي‌ دوزله‌گيل‌

هر گوشه‌ده‌ نياز اوقين‌ گزله‌گيل‌

بيلديگينگچه‌، ميدام‌ ياغشي‌ سوزله‌گيل‌

ياغشي‌ سوز تاپماسانگ‌،اوتور سم‌ بولوپ‌

 

مختومقلي‌ الله‌ آدين‌ ذكر ايله‌

يامانا صبر ايله‌، ياغشا شكر ايله‌

گورستاني‌ گور-ده‌، اوتور، فكر ايله‌

من‌-من‌ ديين‌ ارلر ياتير قوم‌ بولوپ‌

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی