چاتيپ‌بولمايار



ايكي‌ داغينگ‌ آغاجي‌نينگ‌ باشيني‌
دويبي‌ بير بولماسه‌ چاتيپ‌ بولمايار
معلقينگ‌ آغير نهنگ‌ داشيني‌
قول‌ بيلن‌ گوتريب‌، آتيپ‌ بولمايار
 
كلته‌ دينگ‌دن‌ بولماز بييك‌ مناره‌
يامان‌ خاتين‌ دوشسا بير ياغشي‌ اره‌
باشين‌ كسيپ‌، قانين‌ دوكوپ‌ كناره‌
يا اولدوريب‌، يا-دا ساتيپ‌ بولمايار
 
ايل‌ ايچينده‌ سنينگ‌ اولالسا آدينگ‌
سني‌ يامان‌ گورمز ياقينينگ‌، يادينگ‌
قولونگدا بولماسه‌ بير گرك‌ زادينگ‌
منكگي‌ ديييپ‌، باشين‌ توتوپ‌ بولمايار
 
فقيرلار مال‌ ديير، بايلار زر ديير
يكه‌ اشك‌لي‌: "آط‌ بر، اسريك‌ نر" ديير
دنيادن‌ دويماق‌ يوق‌، "ينه‌ بر" ديير
كونگول‌ مقصدينه‌ يتيب‌ بولمايار
 
هر كيم‌ الين‌ گرر فاني‌ جهانا
ساغليقدا جفا بيير بو شيرين‌ جانا
بو دنيا بيل‌ باغلان‌ قالار زيانه‌
دنيا دوستليغينه‌ بيتيب‌ بولمايار
 
كور فقيرلار: "گوزوم‌!" ديير گورمه‌سه‌
آغساقلار آياق‌سيز توتوپ‌ يورمه‌سه‌
هر كيمينگ‌ ايسته‌گين‌ تانگري‌ برمه‌سه‌
باريب‌:"مانگا بر!"دييپ‌توتوپ‌ بولمايار
 
مختومقلي‌، نصيحتيم‌ بولماسا
سانا گچمن‌ هر كيم‌ قولاق‌ سالماسا
ييگيت‌ كونگول‌ سويه‌نيني‌ آلماسا
اينجاليپ‌، فراغت‌ ياتيپ‌ بولمايار

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی