خبربرــشيله‌دير



مختومقلي‌:
ـ او نامه‌ دير، ياشيل‌-قيزيل‌ اوويسيار؟
او نامه‌ دير، آياغي‌ يوق‌، تاويسيار؟
اول‌ نامه‌ دير، يدي‌ دريا بوويسيار؟
شاعر بولسانگ‌، شوندان‌ بيزه‌ خبر بر!

دوردي‌ شاعر:
- اول‌ اكين‌ دير، ياشيل‌-قيزيل‌ اوويسيار
اول‌ ييلان‌ دير، آياغي‌ يوق‌، تاويسيار
اول‌ باليق‌ دير، يدي‌ دريا بوويسيار
بيزدن‌ سلام‌ بولسون‌، جواب‌ شيله‌ دير

 مختومقلي‌:
ـ او نامه‌ دير، ياقاسي‌ بار، ياني‌ يوق‌؟
او نامه‌ دير، قاناتي‌ بار، قاني‌ يوق‌؟
او نامه‌ دير، آدم‌ يوودار، جاني‌ يوق‌؟
شاعر بولسانگ‌، شوندان‌ بيزه‌ خبر بر!

 دوردي‌ شاعر:
- اول‌ كفن‌دير، ياقاسي‌ بار، ياني‌ يوق‌
 كبه‌لك‌دير، قاناتي‌ بار، قاني‌ يوق‌
قارا ير دير، آدم‌ يوودار، جاني‌ يوق‌
بيزدن‌ سلام‌ بولسون‌، جواب‌ شيله‌ دير

 مختومقلي‌:
ـ او نامه‌ دير، دروازه‌سيز قالادير؟
او نامه‌ دير، پنجره‌سيز بنادير؟
او نامه‌ دير، بير-بيريندن‌ آلادير؟
شاعر بولسانگ‌، شوندان‌ بيزه‌ خبر بر!

دوردي‌ شاعر:
-اول‌ كونگول‌ دير، دروازه‌سيز قالادير
اول‌ قبردير، پنجره‌سيز بنادير
اول‌ آي‌-گون‌دور،بير-بيريندن‌ آلادير
بيزدن‌ سلام‌ بولسون‌، جواب‌ شيله‌ دير

 مختومقلي‌:
ـاو نامه‌ دير، اييمه‌دي‌لر، دويدي‌لار؟
 او نامه‌ دير، قيامته‌ قويدي‌لار؟
اول‌ كيم‌ ايدي‌، دابانيندان‌ سويدي‌لار؟
شاعر بولسانگ‌، شوندان‌ بيزه‌ خبر بر!
 
 دوردي‌ شاعر:
-اول‌ ديداردير، اييمه‌دي‌لر، دويدي‌لار
 اول‌ نمازدير، قيامته‌ قويدي‌لار
نسيمي‌ني‌ دابانيندان‌ سويدي‌لار
  بيزدن‌ سلام‌ بولسون‌، جواب‌ شيله‌ دير
 
 مختومقلي‌:
ـ او نامه‌ دير، يدي‌ اولكاني‌ گزيان‌؟
 او نامه‌ دير، بيلي‌ني‌ بير زات‌ ازيان‌؟
او نامه‌ دير، آدم‌ مثالي‌ سيزيان‌؟
شاعر بولسانگ‌، شوندان‌ بيزه‌ خبر بر!
 
 دوردي‌ شاعر:
- اول‌ چوپان‌ دير، يدي‌ اولكاني‌ گزيان‌
اول‌ قويون‌دير، تاياق‌ بيلي‌ني‌ ازيان‌
بدو آط‌لار، آدم‌ مثالي‌ سيزيان‌
 بيزدن‌ سلام‌ بولسون‌، جواب‌ شيله‌ دير

 مختومقلي‌:
ـ او نامه‌ دير، توپراق‌ اوسته‌ سورونمز؟
او نامه‌ دير، آدم‌لارا گورونمز؟
او نامه‌ دير، هيچ‌ بير دونا بورنمز؟
شاعر بولسانگ‌، شوندان‌ بيزه‌ خبر بر!

 دوردي‌ شاعر:
- ارن‌لر دير، توپراق‌ اوسته‌ سورونمز
اول‌ بلا دير، آدم‌لارا گورونمز
يالان‌ گوررونگ‌ هيچ‌ بير دونا بورنمز
 بيزدن‌ سلام‌ بولسون‌، جواب‌ شيله‌ دير

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی