اكيپ‌گچدي


اول‌ آدم‌ ايندي‌ دنيا

بو دنياني‌ اكيپ‌ گچدي‌

هر پيغمبر بير كسب‌ آچدي‌

كسبين‌ مدام‌ اديپ‌ گچدي‌

 

بلا گلدي‌ لنبر-لنبر

دعا قيلدي‌ انبار-انبار

اوز دورونده‌ نوح‌ پيغمبر

نجار ايشين‌ توتوپ‌ گچدي‌

 

عزراييله‌ جانين‌ برن‌

آنينگ‌ بيلن‌ صحبت‌ قوران‌

جنت‌ ايچره‌ ديري‌ گيرن‌

ادريس‌ كوينك‌ تيكيپ‌ گچدي‌

 

اول‌ عيسي‌ گلينچا دايم‌

اصحاب‌ كهف‌ ياتار قايم‌

حقينگ‌ يولوندا ابراهيم‌

جانين‌ اوده‌ ياقيپ‌ گچدي‌

 

ذاتي‌ اگري‌ گوننمه‌دي‌

اصلي‌ دوغرولار دونمه‌دي‌

قورت‌ ايوبينگ‌ تنين‌ اييدي‌

ابليس‌ شونچا دگيپ‌ گچدي‌

 

سليمانينگ‌ عالي‌ جاهي‌

دورت‌ يوز قورولار بارگاهي‌

انسينگ‌، جنسينگ‌ پادشاهي‌

اول‌ هم‌ زنبيل‌ دوقيپ‌ گچدي‌

 

ط‌ور داغي‌ ديير، دوشر يولا

راز آيديشار خدا بيله‌

عصاصين‌ گوتريپ‌ قولا

موسي‌ قويون‌ باقيپ‌ گچدي‌

 

قبيس‌ داغينينگ‌ بورنونده‌

اوغلون‌ تاپمادي‌ اورنونده‌

يونس‌ باليغينگ‌ قارنينده‌

"انت‌ سبحان‌" اوقيپ‌ گچدي‌

 

كنعان‌ ايچينده‌ قيرق‌ ييللاپ‌

گيجه‌-گونديز دعا ايلاپ‌

يوسفينگ‌ كاكلين‌ زارلاپ‌

يول‌ اوستونده‌ يعقوب‌ گچدي‌

 

خرما دوراپ‌ خشك‌ آغاچدان‌

ال‌ بيلن‌ آي بولدي‌ عرشدان‌

رسول‌ الله‌ اول‌ قريشدان‌

نه‌ جفالار چكيپ‌ گچدي‌

 

آلديلار جنت‌ ايوانين‌

حق‌ يولداش‌ اتدي‌ ايمانين‌

بيرنيچه‌ امت‌لار قانين‌

كربلادا دوكوپ‌ گچدي‌

 

سوزوم‌ يوقار حق‌ دوستونه‌

كار اتمز دنيا مستينه‌

دوشمان‌ جفاسي‌ دوستونه‌

اوي‌سيز يرده‌ بوقوپ‌ گچدي‌

 

مختومقلي‌، هر كيم‌ خاص‌دير

ايشي‌ درگاهه‌ اخلاص‌دير

بيزه‌ اولاردان‌ ميراث‌دير

هر دوستونه‌ دگيپ‌ گچدي‌

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی