اوزي‌بهشتينگ‌


گوكدن‌ يوقاريدير عرشدان‌ آشاقدير

اي‌ يارانلار، اورني‌ ــ اوزي‌ بهشتينگ‌

هزار مونگ‌ نغمه‌سي‌، يوز مونگ‌ مقامي‌

دايم‌ قوروغلي‌دير سازي‌ بهشتينگ



خضر ياشين‌ روزي‌ قيلسا گزماگه‌

داود كاتب‌ليگين‌ برسه‌ يازماغا

گيجه‌ - گونديز دورسام‌ شرحين‌ دوزماگه‌

مونگدن‌ بير آيديلماز سوزي‌ بهشتينگ‌

 

درويش‌ دويشده‌ گوروپ‌ بولميش‌ عاشقي‌

قيزيلدان‌ قايريلميش‌ فرشي‌، ايشيگي‌

عالمي‌ غرق‌ ايلار نوردان‌ ايشيغي‌

اگر بير آچيلسا يوزي‌ بهشتينگ‌

 

كلام‌ ايچره‌ اوقيپ‌ آيدار ملا لار

قوللوقچي‌ رضوان‌لار، انچه‌ شله‌لر

مرصع‌ حلقه‌لر، نازك‌ حله‌لر

توكنمز نعمتي‌ - نازي‌ بهشتينگ‌

 

شرحيني‌ آيتماغا آغزيم‌، ديليم‌ يوق‌

حق‌ اوزي‌ حاكم‌ دير، جبر، ظ‌لم‌ يوق‌

قايغي‌ غم‌ يوق‌، قارريليق‌ يوق‌، اولوم‌ يوق‌

آيريلماز، ساويلماز يازي‌ بهشتينگ‌

 

يوز شربتدن‌ معجون‌ بولوپ‌ قاتيلان‌

قارا ساچلار آق‌ توپوقدا چاتيلان‌

قرابا ترابا تازه‌ يتيلن‌

سيپانار، ساللانار قيزي‌ بهشتينگ‌

 

مونوپ‌ سيران‌ اوچين‌ براغ‌ آط‌لاري‌

گونبه‌-گوندن‌ آرتار كونگول‌ شادلاري‌

لعلي‌ - ياقوت‌دان‌ دير بولان‌ زاتلاري‌

هيچ‌ بولماغاي‌ گردي‌ - توزي‌ بهشتينگ‌

 

بيشگاي‌ الوان‌ ال‌ دگمه‌يين‌ آشلاري‌

قدرت‌ بيلن‌ بريان‌ بولوپ‌ گوشت‌لري‌

تاي‌ گلر دنياگه‌ درهم‌ داشلاري‌

آرتيق‌ دير هر يتن‌ چيزي‌ بهشتينگ‌

 

هر نوبت‌ مونگ‌ دورلي‌ شراب‌ ايچيلن‌

آلماز هونجي‌، ياقوت‌، درلر ساچيلان‌

رنگ‌ برنگ‌ بي‌حساب‌ گل‌لر آچيلان‌

مشكي‌ - عنبر قوقار ايسي‌ بهشتينگ‌

 

حق‌ قبول‌ ايله‌ييپ‌ دوستون‌، اغيارين‌

حاصل‌ اديپ‌، هر نه‌ مقصدين‌ بارين‌

گورسه‌ديپ‌ اول‌ گونده‌ خلقه‌ ديدارين‌

بودور مومن‌لرگه‌ رازي‌ بهشتينگ‌

 

مختومقلي‌، وصفي‌ گلمز ديل‌لره‌

ديله‌ گلسه‌، بيان‌ اتسم‌ ايل‌لره‌

عاجز بنده‌لره‌، عاصي‌ قول‌لارا

يا رب‌، اوزونگ‌ ايله‌ روزي‌ بهشتينگ‌

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی