دالديربودنيا



مغربدان‌ مشرقه‌ دنيانينگ‌ يوزي
 دييمانگ‌، بيزه‌ معلوم‌ دالدير بو دنيا
آبادي‌، خرابي‌، درياسي‌، دوزي‌
 يوز قيرق‌ آلتي‌ مونگ‌ آغاچ‌ يولدور بو دنيا
 
بو جهان‌ يوزونده‌ ايش‌لر پيدا دير
 تفرج‌ دير، تماشادير، غوغا دير
قيرق‌ آلتي‌ مونگ‌ آغاچ‌ سوودور، دريا دير
 يتميش‌ ايكي‌ تويسلي‌ ديل‌ دير بو دنيا
 
بير اللي‌ مونگ‌ آغاچ‌ يوللار آندا بار
 ديو - پري‌ مسكني‌ غول‌لار آندا بار
داغلار، داشلار، آچ‌ آرسلانلار آندا بار
 اول‌ يرده‌ آدمدان‌ چولدور بو دنيا
 
اون‌ ايكي‌ مونگ‌ آغاچ‌ جايي‌ هندوستان‌
  آلتي‌ مونگ‌ آغاچ‌ يول‌ ارض‌ رومستان‌
دورت‌ مونگ‌ سقلاب‌، سنجاب‌، دورت‌ مونگ‌ زنگستان‌ 
  گويا گچيپ‌ بارغان‌ سيل‌دير بو دنيا
 
دورت‌مونگ‌ فرسخ‌ يمن‌، بير مونگ‌-ده‌ بلغار
زمين‌ يونان‌ هم‌ بولار يك‌ هزار
مونگ‌ آغاچ‌ يول‌ داغ‌ دير، ديو مردمخوار
 آندا ييغيپ‌ بارغان‌ سال‌  دير بو دنيا
 
مونگ‌ آغاچ‌ كليم‌ گوش‌، يك‌ دست‌ و يك‌ پا 
 باش‌ مونگ‌ آغاچ‌ ياجوج‌، مونگ‌ آغاچ‌ صحرا
يدي‌ مونگ‌ آغاچ‌ ير جزيره‌، دريا 
 مونگ‌ آغاچ‌ ير ياتان‌ مال‌ دير بو دنيا
 
ايكي‌ مونگ‌ اوچ‌ يوز آغاچ‌ اهل‌ اسلام‌ دير
 عراق‌، آذربايجان‌، مصر دير، شام‌ دير
خراسان‌، فارس‌، فيروزكوه‌، تمام‌ دير 
  يوق‌ بولينچا قالماغال‌ دير بو دنيا
 
مختومقلي‌، آدينگ‌ دوندي‌ فراغا
 فارغ‌ بولوپ‌ چك‌ اوزونگي‌ قيراغا
حساب‌ اتديم‌ دنيا باشــــــــــدان‌ آياغا
اوچ‌ يوز آلتميش‌ ييل‌ليق‌ يولدور بو دنيا

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی