دون‌گرك‌



نه‌ بيله‌ سن‌ آدمزاد
چيپلاق‌ دوغدونگ‌، دون‌ گرك‌
آق‌ سويت‌ امدينگ‌، اولالدينگ‌
آغلايير سن‌، نان‌ گرك‌
 
آتانگ‌ خشنود بولماغا
انه‌نگ‌ مهرين‌ سالماغا
يدينگده‌ دين‌ بيلماگه‌
اوقيرغا قرآن‌ گرك‌
 
سايلايير سن‌ دلبندينگ‌
يوغنالار بيلينگ‌، بندينگ‌
اون‌ باشده‌ آرزومندينگ‌
قيز گرك‌، جوان‌ گرك‌
 
جوان‌ تاپدينگ‌ قوچماغا
عيش‌ و عشرت‌ آچماغا
آندان‌ سونگ‌ اييپ‌ - ايچماگه‌
بير توكمنز نان‌ گرك‌
 
كونگلون‌ اينجيديپ‌ خلقينگ‌
خشنود اتسنگ‌ اوز خلقينگ‌
روم‌، فرنگ‌ بولسا ملكينگ‌
هنوز "آزدير"، كان‌ گرك‌
 
ياتسانگ‌ دوشكده‌ بيمار
ايسسيغ‌ اتمز مال‌ و كار
زر دوكسنگ‌ خروار - خروار
گوزه‌ ايلمز، جان‌ گرك‌
 
دعا بيلن‌ ار گوگار
ياغمير بيلن‌ ير گوگار
ار اول‌ دير ــ آلقيش‌ آلار
يرلره‌ باران‌  گرك‌
 
اجل‌ گلر اويدا يوق‌
گورمك‌ ييلدا، آيدا يوق‌
هيچ‌ بير زاتدان‌ پيدا يوق‌
بير نور ايمان‌ گرك‌
 
مختومقلي‌، سوزله‌ين‌
نيچه‌ مخفي‌ گيزله‌ين‌
بير معني‌ فهم‌ ايله‌ين‌
عقللي‌ ياران‌ گرك‌

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی