ساتاشديم‌



سحر وقتي‌ سيران‌ اديپ‌ گزركام‌
عجب‌ منزل‌، عجب‌ جايه‌ ساتاشديم‌
اوغريم‌ بيلماي‌، يولدان‌ - يولا آزارقام‌
خوب‌ مكانا، خوب‌ سرايه‌ ساتاشديم‌
 
اوستاسيز ايشله‌نن‌، كيريش‌سيز قاتيلان‌
قيمات‌سيز ساتيلان‌، ال‌سيز توتولان‌
قول‌ دگماي‌ چكيلن‌، اوق‌سيز آتيلان‌
چله‌سيز قورولان‌ يايه‌ ساتاشديم‌
 
نيجه‌ دوست‌لار بيلن‌ سيرانده‌ اكن‌
خاط‌اردان‌ آزاشديم‌، كرون‌ده‌ اكن‌
جاندان‌ اميد اوزوب‌، حيرانده‌ اكن‌
ييلديزدان‌ يول‌ ياساب‌، آيه‌ ساتاشديم‌
 
كونگلوم‌ گيتدي‌ دوست‌لار ايچن‌ شربت‌ده‌
اولار يوز صفاده‌، من‌ مونگ‌ حسرت‌ده‌
آيريليپ‌ - نالاده‌، قالديم‌ غربت‌ده‌
چشمه‌دن‌ سوو ايستاب‌، چايه‌ ساتاشديم‌
 
نه‌ تنده‌ قوات‌ بار، نه‌ ايچده‌ جان‌ بار
بو ايشده‌ نه‌ سود بار، بيلمن‌، زيان‌ بار
نه‌ حساب‌، نه‌ حسيب‌، نه‌ بللي‌ سان‌ بار
كيشي‌ بيلمز، نه‌ سودايه‌ ساتاشديم‌
 
باشه‌ باغلاپ‌ ديوانه‌ليق‌ كمنديم‌
سگره‌ديپ‌ يتيشديم‌ عشقه‌ سمنديم‌
آل‌ شرابه‌ ال‌ اوزاتديم‌، امنديم‌
دوروسين‌ ايچميش‌لر، لايه‌ ساتاشديم‌
 
مختومقلي‌ دييرلر منينگ‌ آديمي‌
عالم‌ الين‌ چويار، گورسه‌ اوديمي‌
اي‌، يارانلار، كيمه‌ دييم‌ داديمي‌
باشيم‌ چيقماز، نه‌ غوغايه‌ ساتاشديم‌

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی