سوزوم‌بار



قولاق‌ سالينگ‌، قارداشلار
بير عجايب‌ سوزوم‌ بار
نه‌ آزمايش‌ ايله‌يير
دوست‌لارينا پروردگار
 
جهان‌ ايشي‌دير جفا
كيم‌ گوردي‌ آندان‌ وفا
حقينگ‌ دوستي‌ مصط‌فا
قالماميش‌ بو روزگار
 
پيغمبر يوق‌ ايزيندان‌
نور دوكولر يوزوندن‌
عالم‌ اونونگ‌ سوزوندن‌
تاپدي‌ نظ‌امي‌-قرار
 
اي‌ دين‌ ايسته‌ين‌ دوستان‌
بولما مالدان‌ مي‌ مستان‌
آيدايين‌ بير خوش‌ دستان‌
اگر بولسانگ‌ خريدار
 
سس‌ دوشگاچ‌ زمين‌لرگه‌
يل‌ يوق‌ بولدي‌ دين‌لرگه‌
مسجدده‌ مومن‌لرگه‌
وعظ‌ آيداردي‌ پيغامبر
 
رسول‌ منبرگه‌ قالميش‌
اوچ‌ مونگ‌،اوچ‌ يوز ييغيلميش‌
جمعه‌ اوچين‌ جمع‌ اولموش‌
صحابه‌لار ــ ناكي‌ بار
 
يارانلار حيران‌ واله‌
سوز يتيشدي‌ بو حاله‌
حق‌ اوچين‌ برلن‌ ماله‌
هر بيرينه‌ اون‌ تاييار
 
دييدي‌ علي‌: "بارايين‌
نه‌ بار اركن‌، گوره‌يين‌
الله‌ اوچين‌ بره‌يين‌
آز و كوپ‌ هر نه‌ كيم‌ بار
 
گلدي‌ دييدي‌: "يا زهرا
كونگلونگ‌ اويدورما قهرا
بريپ‌ آلايين‌ بهره‌
گر تنگه‌ بولسا تاييار"
 
فاط‌مه‌ ديير: "بولسا درهم‌
بارسام‌، ط‌عامه‌ برسم‌
بو ايكي‌ نوري‌ ديدام‌
گون‌ ياريم‌ آچ‌ دير، آغلار"
 
دييدي‌ علي‌: "يا سبحان‌"
تلموريپ‌ باقيپ‌ هر يان‌
چيقدي‌ قاپا ناگهان‌
گلدي‌ بير سائل‌ دوچار
 
ديير: "قيلماغين‌ ناشاد سن‌
ايله‌ باشيم‌ آزاد سن‌
سن‌ بير مشكل‌گشاد سن‌
قيرق‌ مونگ‌ ط‌لا  قرضيم‌ بار
 
خاتينيم‌ باردي‌، اوتدي‌
شيرخواره‌ قيزيم‌ قالدي‌
اويوم‌ هم‌ ويران‌ بولدي‌
شونچا بولدوم‌ من‌ ابكار
 
گدايا: "سن‌ قال‌!" دييدي‌
اوغلانلارنا: "گل‌!" دييدي‌
بير جهودغا: "آل‌!" دييدي‌
"اوغلانلاريمي‌، زينهار
 
پولون‌ ادر من‌ قاراو
اويومه‌ گلميش‌ بيراو
اوغلانلار بولسون‌ گرو
پولونگ‌ بولغينچا تاييار"
 
جهود ساقلادي‌ قولني‌
علي‌غا بردي‌ پولني‌
گداي‌ هم‌ توتدي‌ يولني‌
گيتدي‌ خوش‌ خرم‌وار
 
فاط‌مه‌ اوتورار اويده‌
اوغلان‌لاري‌ گروده‌
انه‌سي‌ گوروپ‌، جهوده‌
دييدي‌: "نه‌ دير اوغلان‌لار؟"
 
"آغاسي‌ ديير - آلارني‌
ساتدي‌ علي‌ بولارني‌
قولدانير من‌ قول‌لارني‌
پولوم‌ بولماغينچا تاييار
 
ديير: "آغا، آمان‌ - نوربت‌
تا گلينچا اول‌ حضرت‌
ساقلا بولارني‌ حرمت‌
گور، نا بولار آخر كار
 
اول‌ اولوغ‌ جهود اتمز
انه‌سي‌نينگ‌ سوزون‌ توتماز
اوتوز اوچ‌ قولاچ‌ يوز يتمز
قيرق‌ قولاچ‌ قويوسي‌ بار
 
جهود آيدار قوللارنا
"دوشونگ‌ قويي‌ يوللارنا"
يوپ‌سيز كويزه‌ قوللارنا
"دورمانگلار سوو چكينگ‌لر"
 
گوتردي‌لر كويزاني‌
گوردي‌ جبراييل‌ اوني‌
ميكاييل‌ سيقدي‌ يرني‌
آقدي‌ قويي‌ چشمه‌وار
 
كويزاني‌ قالديردي‌لار
چشمه‌دن‌ دولدوردي‌لار
دورمايين‌ گلتيردي‌لر
بولدي‌ جهود شرمسار
 
كويزاني‌ خوم‌غا دوكدي‌
توكنمز آريق‌ آقدي‌
چاي‌ داشيپ‌، دوزه‌ چيقدي‌
جهود گوروپ‌ اتدي‌ زار
 
جهود ايله‌ييپ‌ خذمت‌
گتيردي‌ نازي‌ - نعمت‌
توتدي‌ بولارني‌ حرمت‌
دييدي‌: "بولمانگ‌ بي‌قرار
 
شاهزاده‌لار سلامت‌
كونگول‌لري‌ عمارت‌"
علي‌ ايلاپ‌ ط‌هارت‌
كونگلونده‌ غم‌ بسيار
 
حقغه‌ ايله‌ييپ‌ نياز
دييدي‌: "ايا چاره‌ساز"
قيلدي‌ بو ركعت‌ نماز
گوردي‌ بير قوش‌ زرنگار
 
بويني‌ مروردن‌ هونجي‌
بهاسي‌ عالم‌ گنجي‌
شاهزاده‌لار قووانجي‌
ديييپ‌ توتدي‌ به‌ يك‌ بار
 
قوش‌ روان‌ قانات‌ چالدي‌
علي‌ني‌ گوكگه‌ آلدي‌
"برك‌ توت‌!"دييپ‌ آواز گلدي‌
گيتدي‌ علي‌ بارها-بار
 
اول‌ مرغ‌ زرين‌ نقاش‌
آسمانلارغا اوروپ‌ باش‌
علي‌ني‌ اولكه‌دن‌ داش‌
التيپ‌ سالدي‌ بير ديار
 
يتيشدي‌ بير ديارا
حيران‌ بولدي‌ بول‌ كاره‌
ايستار ير آدين‌ سورا
هيچ‌ اركك‌ يوق‌، عيال‌ بار
 
ديير: "نه‌ بي‌حساب‌ كان‌سيز
نه‌ خوش‌ صفت‌ خوش‌ جان‌سيز
نچون‌ تمام‌ زنان‌ سيز
غريبام‌، برينگ‌ خبر"
 
دييدي‌: "عيد ماحالي‌ دير
خلق‌ ايچرده‌ دولي‌دير
خمس‌، عشر مالي‌ دير
مسجدلر خروار - خروار
 
علي‌ موني‌ اشيتدي‌
تازه‌ ط‌هارت‌ اتدي‌
خلقينگ‌ جمعينه‌ گيتدي‌
توتدي‌ بير كنجده‌ قرار
 
واعظ‌ چيقدي‌ منبره‌
خلقه‌ نصيحت‌ بره‌
سوزون‌ تاپمادي‌ سيرا
ييغلاپ‌ اوتوردي‌ ناچار
 
نصحيتينگ‌ دلپذير
تاپيپ‌ سندن‌ خلق‌ حضور
خلق‌لار آيدار: "شاه‌ وزير
ايل‌ سوزونگه‌ انتظ‌ار"
 
واعظ‌ ديير: "بولونگ‌ آگاه‌
ياديمغا گلمز ناگاه‌
واي‌ وزير، واي‌ پادشاه‌
موندا محمدي‌ بار"
 
دييرلر: تاپساق‌ احمدي‌
ايلارميز اونگا بدي‌
بار بولسا، محمدي‌
پارالارميز صد هزار
 
شيرين‌ ايلاپ‌ ديل‌لرني‌
آلداپ‌ آلميش‌ ايل‌لرني‌
آتا - بابا يوللارني‌
ترك‌ اديپ‌ بولموش‌ بيزار"
 
واعظ‌ آيدار: "اي‌ مردان‌
كونگلوم‌ قورقار اول‌ اردن‌
چاغيرايين‌ منبردن‌
اول‌ اوزون‌ ايلار آشكار
 
واعظ‌ه‌ قولاق‌ ساليپ‌
اوشبو پنديني‌ آليپ‌
بارچاسي‌ راضي‌ بولوپ‌
اوتوردي‌لار انتظ‌ار
 
واعظ‌ ديير: "حق‌ قدرتي‌
پيغامبرينگ‌ حرمتي‌
اوونگ‌ بيلدير، اي‌ فتي
‌اون‌ ايكي‌ سواليم‌ بار
 
اگر اوزونگ‌ بيلديرسنگ‌
قارشيمدا گليپ‌ دورسانگ‌
سوزوم‌ جوابين‌ برسنگ‌
مال‌ بره‌ي‌ خروار - خروار"
 
قهري‌ قايناپ‌ باشيندان‌
توردي‌ علي‌ جوشوندان‌
باردي‌ واعظ‌ پيشيندن‌
ديير: "منم‌ احمدي‌وار
 
قول‌ بولارميز تقديره‌
بيلمس‌ بيز بو ير نيره‌
نه‌ سوزونگ‌ بولسا سورا
سونكرا اوچ‌ سواليم‌ بار"
 
مسجد ايچره‌ ضحي‌ دك‌
خلق‌لار دييدي‌: سحي‌ دك‌"
علي‌ بير آژدارها دك‌
سورنوپ‌ توردي‌ ستونوار
 
خوفه‌ دوشر تنده‌ جان‌
لرزانه‌ گلر جهان‌
واعظ‌ ديير: "اي‌ جوان‌
گلمه‌سين‌ قهرينگ‌ زينهار"
 
آيديشلارغا يوق‌ تابيم‌
اوقارغا يوق‌ كتابيم‌
واعظ‌ آيتسا جوابيم‌
من‌ سورار من‌ به‌ يك‌ بار"
 
شير سوزون‌ تمام‌ اتدي‌
درس‌ آلان‌ كلام‌ اتدي‌
نوبت‌ كافره‌ يتدي‌
گورونگ‌، سوالين‌ سورار:
 
"بير نه‌ دير، ايكي‌ بولماز
ايكي‌ نه‌ دير، اوچ‌ بولماز
اوچ‌ هم‌ نه‌ دير دورت‌ بولماز
باش‌ آلتا يوق‌ برابر
 
باش‌ نه‌ دير، آلتي‌ بولماز
آلتي‌ بار،يدي‌ بولماز
يدي‌ هم‌ سكيز بولماز
دوقوزدان‌ سوزله‌ اخبار
 
اون‌ نه‌ دير، اون‌ بير بولماز
اون‌ بير هم‌ اون‌ ايكي‌ بولماز
اون‌ ايكي‌دن‌ اون‌ اوچ‌ بولماز"
دييپ‌، تمام‌ اتدي‌ گفتار
 
علي‌ حقينگ‌ كتابين‌
آچيپ‌ معرفت‌ بابين‌
"آيداي‌ واعظ‌ جوابين‌
دينگله‌يينگ‌، اي‌ شهريار
 
تانكري‌ بير، ايكي‌ بولماز
ايكي‌ آي‌-گون‌ اوچ‌ بولماز
اوچ‌ وتر هم‌ دورت‌ بولماز
دورت‌ عناصر چهار
 
باش‌ نمازدير اول‌ باش‌ وقت‌
آلتي‌ دير آلتي‌ جهت
هفت‌ دوزخ‌، سكيز جنت‌
دوقوزي‌ نه‌ حمله‌وار
 
اون‌ حاجيان‌ ايشي‌ خوب‌
اون‌ بيري‌ پسر يعقوب‌
اون‌ ايكي‌ آيدار مرعوب‌"
ديير:"داخي‌ نه‌سوزونگ‌ بار؟"
 
"راست‌ دير"دييپ‌آچدي‌ آغيز
خط‌ اديپ‌ يازدي‌ كاغذ
قبول‌ ايله‌دي‌ واعظ‌
هم‌ بارچا خلايق‌لار
 
واعظ‌ دوردي‌ بلي‌گه‌
قايل‌ بولدي‌ ولي‌گه‌
خلق‌لار آيتدي‌ علي‌غا
"سن‌ سورا،نه‌ سوزونگ‌ بار؟"
 
علي‌ آچدي‌ كتابين‌
دوكوپ‌ گوزوندن‌ آبين‌
"آيتسا واعظ‌ جوابين‌
بارچا بيردن‌ آيدينگ‌لار"
 
علي‌ ديير: "واعظ‌ دييسين‌
واعظ‌ سوزون‌ شاه‌ دييسين‌
شاه‌ دييديگين‌ خلق‌ دييسين‌
من‌ هم‌ سوراي‌ به‌ يك‌ بار"
 
خلايق‌ جمعي‌ آگاه‌
قبول‌ اتدي‌لر ناگاه‌
واعظ‌، وزير، خلق‌ و شاه‌
بارچا اتدي‌ اعتبار
 
شير خدا شاد بولوپ‌
خداغا شكر قيليپ‌
نوبت‌ علي‌غا گليپ‌
سوراسين‌ شير جبار
 
نه‌ دير عرش‌ده‌ بيتيلميش‌
ط‌وبي‌ آغاچ‌دا يازيلميش‌
بهشت‌ قاپي‌سيندا بيتيلميش‌"          
دييپ‌، تمام‌ اتدي‌ گفتار             
 
واعظ‌ ايله‌دي‌ فكر
قيلماق‌ گرك‌ ديييپ‌ ذكر
واعظ‌ گوردي‌، ايش‌ چوقور
آيتماقچي‌ بولدي‌ اي‌ يار
 
لا اله‌ الا  الله‌
محمد رسول‌ الله‌
اوچ‌ دييپ‌ موني‌ خلق‌ و شاه‌
مسلمان‌ بولدي‌ كفار
 
شاه‌، وزير اوزلرگه‌
خوار توتماديق‌ گوزلرگه‌
"آيتماق‌ واجب‌ بيزلرگه‌"
دييدي‌لر "بولدوق‌ اقرار"
 
خلقا اعلام‌ بريلدي‌
كفردن‌ دين‌ اورولدي‌
دينه‌ تعليم‌ بريلدي‌
قيلدي‌لار غسلي‌ كفار
 
حق‌ اوندان‌ رحمت‌ ساچيپ‌
نور گليپ‌، ظ‌لمت‌ قاچيپ‌
شاه‌ علي‌ بوينون‌ قوچوپ‌
كوپ‌ ييغلادي‌ زار زار
 
ديير: "اي‌ شاه‌ ولايت‌
بيز خشنود اولدوق‌ غايت‌
سندن‌ تاپديق‌ هدايت‌
سن‌ اسلام‌ اتدينگ‌ آشكار
 
سورادي‌لار گلگانين‌
اول‌ هم‌ آيتدي‌ بولغانين‌
هر نه‌ زار ييغلاغانين‌
اتدي‌لر اونگا نثار
 
يوز مونگ‌ آلتين‌ بيير نقدي‌
چپ‌ قوينونا بير نقدي‌
آلدي‌، قالادان‌ چيقدي‌
گلدي‌ آق‌ قوش‌ زرنگار
 
اولقي‌ كيمين‌ اتدي‌
قوش‌ آياغين‌ توتدي‌
قوش‌ اوچوپ‌، هوا گيتدي‌
ايله‌دي‌ داحل‌ دار
 
جهودلر قارشي‌ گليپ‌
اعزاز و اكرام‌ قيليپ‌
بارچه‌سي‌ راضي‌ بولوپ‌
مال‌ بردي‌لر بي‌شمار
 
حقغه‌ ايلاپ‌ زارلارين‌
بيله‌ آليپ‌ بارلارين‌
گتيردي‌ اوغلانلارين‌
فاط‌مه‌ آندان‌ بي‌خبر
 
شك‌ ايله‌مه‌ بول‌ كويده‌
آرتيغين‌ قويوپ‌ اويده‌
قيرق‌ مونگ‌ آلتين‌ جهوده‌
بردي‌ اول‌ شاه‌ صفدر
 
جهود هم‌ پولون‌ آلدي‌
علي‌ مسجدگه‌ گلدي‌
اول‌ پيغامبرني‌ گوردي‌
سلام‌ ايله‌دي‌، اي‌ يار
 
بو ايش‌ حضرت‌گه‌ لايق‌
رسولغه‌ بولموش‌ آييق‌
رسول‌ آيدار: "خلايق‌
نه‌ قيلميش‌ شير جبار
 
علي‌ مسجددن‌ گيتدي‌
گور، نيچه‌ ايش‌لر بيتدي‌
بير شهري‌ مسلمان‌ اتدي‌
خلق‌ نمازه‌ انتظ‌ار"
 
او شو حق‌نينگ‌ قولي‌دا
بي‌شك‌ شاه‌ ولي‌ده‌
رسول‌ آيدار: "علي‌دا
سورانگلار، كوپ‌ خبر بار
 
علي‌ اول‌ توتغان‌ قوشون‌
حق‌ اوچين‌ اتگن‌ ايشين‌
بير شهر مسلمان‌ اديشين‌
جملاگه‌ بردي‌ اخبار
 
خبرني‌ بردي‌ حيدر
دييرلر: "الله‌ اكبر"
تاسين‌ قالدي‌ پيغامبر
سونگ‌ نمازغا دوردي‌لار
 
حق‌ دييپ‌ گوزدن‌ دوكوپ‌ خون‌
هر كيم‌ موندا برسه‌ دون‌
بو دنياده‌ بيره‌ اون‌
برر اول‌ پروردگار
 
علي‌ بيله‌ خط‌ يازدي‌
مومن‌لر كونگلي‌ قيزدي‌
بولار آخرت‌ مزدي‌
بي‌حساب‌ و بي‌شمار
 
جانيم‌ جرعه‌ مستي‌ دير
ونگلوم‌ حق‌ پيوستي‌ دير
دوستوم‌ علي‌ دوستي‌ دير
گر اخلاصينگ‌ بولسا بار
 
مختومقلي‌ من‌ جانا
اينانماس‌ من‌ جهانا
دعاده‌ ياد قيلانه
 ايام‌ بولسون‌ مددكار

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی