فغان‌اگلنمز



بلبل‌ هجوم‌ ايلاپ‌ هوالي‌ باغلار
بلبل‌ سندن‌ گيدر، فغان‌ اگلنمز
ياغيشلي‌، ياغميرلي‌، اومورلي‌ داغلار
سيل‌لر سندن‌ گيدر، دومان‌ اگلنمز
 
آدم‌ ياراديلميش‌ بلندلي‌، پس‌لي‌
عقل‌لي‌ - فكرلي‌، دالي‌لي‌ - مس‌لي‌
ييگيت‌ليك‌ بير گويا بهارينگ‌ فصلي‌
بهار سندن‌ گيدر، زمان‌ اگلنمز
 
گله‌نه‌ قارشي‌ يوق‌، بولسا مجالينگ‌
ياغشي‌ اوتاورگيل‌ نيتينگ‌ - پالينگ‌
ييگيت‌ليك‌ دورانيندا آچيق‌ توت‌ الينگ‌
دور سندن‌ گيدر، دوران‌ اگلنمز
 
بو دنيا غوغادير، بير قالماغال‌ دير
كيمي‌ بر-ها-بر دير، كيم‌ آل‌-ها-آل‌ دير
ييگيت‌لر، بو دنيا شونگا مثال‌ دير
برق‌ اورار آسماندا، باران‌ اگلنمز
 
بير منزل‌دير، اوچ‌ گون‌ ايييپ‌- ايچن‌ سونگ‌
اورناشيپ‌، گينگره‌نيپ‌، بيلين‌ آچان‌ سونگ‌
اوزنگينگ‌ چكرلر دورت‌ گون‌ گچن‌ سونگ‌
باش‌ گوندن‌ يوقاري‌ ميهمان‌ اگلنمز
 
قوينون‌ آچار بير گون‌، ير سني‌ گيزلار
قارا قومدان‌ دولار بو نرگس‌ گوزلر
آدينگا بويسانما، چمن‌لي‌ دوزلر
چمن‌ سنده‌ قورير، سيران‌ اگلنمز
 
مختومقلي‌، آيدار عارف‌ دوستونا
كيم‌ قالار دوشمه‌ين‌ اجل‌ دستينه‌
فلك‌ بير گون‌ سالار يرينگ‌ آستينا
آغيزدان‌ ديل‌ گيدر، زبان‌ اگلنمز

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی