آلنيميزاگلسه‌گركدير


آمنا صدقنا محشر گونلري‌

بير گون‌ آلنيميزا گلسه‌ گركدير

حذر ايله‌، اوسر اجل‌ يللري‌

جسددن‌ جانلاري‌ آلسا گركدير

 

اجل‌ دوغري‌ گلسه‌، قارشي‌ دورار سن‌

 قاچيپ‌ امكانينگ‌ يوق‌، گووسونگ‌ گرر سن‌

ياقاسيز، اتك‌سيز دونا گيرر سن‌

توينوكسيز اويلره‌ سالسا گركدير

 

منكر نكير سورار، قويماز خوشونگا

هيچ‌ هارايينگ‌ يتمز دگره‌ داشينگا

ياغشي‌ يامان‌، ادن‌ ايشينگ‌ باشينگا

بيرين‌ بيرين‌ قايديپ‌ گلسه‌ گركدير

 

داب الارض‌ گوتار باشا قرآني‌

 سير اديپ‌ گزرميش‌ عالم‌ جهاني‌

بير سيل‌ دك‌ سوو ييغليپ‌ توتار دنياني‌

گورونمز بدبختليق‌ گلسه‌ گركدير

 

يوره‌گيم‌ جوشدورار عشقينگ‌ هوسي‌

ييقيلار، يوق‌ بولار دنيا بناسي‌

ايران‌ جيران‌ دوشر محشر غوغاسي‌

عرصات‌ ميدانا گلسه‌ گركدير

 

اينانماسانگ‌، خبر آلغين‌ عارفدان‌

آندان‌ سونگ‌ ديله‌گين‌، گل‌ شو غريبدان‌

صحرا دشتينه‌، مشرق‌، مغربدان‌

ملكلر ضرب‌ اوروپ‌ سورسه‌ گركدير

 

شفاعتچي‌ بولار، اول‌ گون‌ ارن‌لر

 بير بيريني‌ تانار، قاچار گورنلر

اينانمايان‌ كافر بولار يارانلار

 هر كيم‌ بير صورتدا قوپسا گركدير

 

اعمالينگ‌ سورارلار، دييمه‌ اقبالدير

 غوقالار چوخلانار، نه‌ عجب‌ حالدير

نيچه‌لر گنگ‌ بولار، نيچه‌لر لالدير

نيچه‌لر ديل‌ چيناپ‌ دورسا گركدير

 

نيچه‌لر غالقينيپ‌، تورا بيلمزلر

ملكلر ضربيندان‌ دورا بيلمزلر

نيچه‌لر گوزسيزدير، گوره‌ ببيلمزلر

نيچه‌لر ايت‌ كيمين‌ اويرسه‌ گركدير

 

كيمسينينگ‌ آغزيندان‌ آقار ايرينگ‌، غان‌

كيميسي‌ سويره‌ن‌، چيقماز قهبه‌ جان‌

نيچه‌لر يوزين‌ يورار، نيچه‌لر آرقان‌

 سويتخور باشي‌ بيلن‌ يورسه‌ گركدير

 

نيچه‌لرينگ‌ گوره‌ر گوزون‌ اويديرلار

 نيچه‌لره‌ زهر ذقوم‌ اييديرلر

نيچه‌لره‌ آتش‌ دونلار گيديرلر

نيچه‌لر مايمين‌ دك‌ دورسا گركدير

 

بير ط‌رفدان‌ گلر، ميزان‌ قورولار

 بير ط‌رفدان‌ اودلي‌ گرزي‌ اورولار

بير ط‌رفدان‌ ذره‌ ذره‌ سورالار

هر كيم‌ اوز حسابين‌ برسه‌ گركدير

 

ييلان‌ چيقار پيل‌ دك‌، ديشلري‌ آر دك‌

 نيچه‌سي‌ غاتير دك‌، نيچه‌سي‌ خر دك‌

نيچه‌سي‌ بوغرا دك‌، نيچه‌سي‌ نر دك‌

 چيرپينيپ‌ چيرپينيپ‌ دورسا گركدير

 

غيبتكش‌ صوراتي‌ دونگوزدير، خوك‌دور

قارني‌ يره‌ دگر، گوزلري‌ گوكدير

زناچي‌لار بييك‌ ظ‌لمتدا بكدير

سوزچي‌ني‌ ديليندن‌ آسسا گركدير

 

اوغرينينگ‌، جومري‌نينگ‌ توتان‌ اللرين‌

داغلارلار، دوزلارلار توتوپ‌ ديللرين‌

پشيمان‌ اديپ‌ آغلار اوتن‌ گونلرين‌

ابدي‌ زنداندا دورسا گركدير

 

رسول‌ عرشينگ‌ ساياسيندا بولارلار

 امتلار انگره‌شيپ‌ زاري‌ قيلارلار

شريعت‌سيز پيرلر اينه‌ك‌ بولارلار

صوفي‌سي‌ بوغرا دك‌ چووسه‌ گركدير

 

مختومقلي‌، آدم‌ قالماز اولمه‌ين‌

حقي‌ يادا ساليپ‌، غوللوق‌ قيلمايان‌

بو دنياده‌ مستليك‌ بيله‌ بيلمه‌ين‌

محشر گوني‌ آييليپ‌، بيلسه‌ گركدير

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی