يلديم‌توت‌



دنيا گورماي‌، توتغون‌ قالسانگ‌ بير كنجده‌
بادي‌ پا دك‌ ير يوزونده‌ يلديم‌ توت‌
چين‌ ما - چين‌دا، رومدا، هندده‌، حبشده‌
بولان‌-بولموش‌ هونارلري‌ بيلديم‌ توت‌
 
آچ‌ هم‌ بولسانگ‌، بارما ايله‌ ديله‌گه‌
ديي‌:"كوشك‌ده‌ من‌، باشيم‌ بارميش‌ فلكه‌
چولده‌ قالسانگ‌ هيچ‌ تاپمايان‌ كوله‌گه‌
ارم‌ باغي‌ ايچره‌ سايا بولدوم‌ توت‌
 
آش‌ گورنگده‌، اوزونگ‌ آتما توللانيپ‌
گرچه‌ آچ‌ هم‌ بولسانگ‌، خلقه‌ بلله‌نيپ‌
زر دوكوپ‌ان‌، چين‌ قوللارني‌ قولدانيپ‌
تيز هم‌ بولسانگ‌، نوح‌ ياشينا گلديم‌ توت‌
 
محتاج‌ليگينگ‌ حقدان‌ اوزگه‌ بيلمه‌سه‌
اول‌ روزگار بسدير، آچدان‌ اولمه‌سه‌
هندي‌ كيمين‌ اگين‌-اورتونگ‌ بولماسا
پادشاليق‌ پوشش‌ چيگنه‌ سالديم‌ توت‌
 
سوو، يله‌ حكمي‌ گچن‌ سليمان‌
باق‌، اولاردان‌ نه‌ نام‌ قالدي‌، نه‌ نشان‌
تشنه‌ قاليپ‌، جايينگ‌ بولسا چولستان‌
دريا ايچره‌ من‌ اسكندر بولدوم‌ توت‌
 
يولداش‌ بولسانگ‌ ديله‌ دوشمز مور بيله‌
فرش‌ تاپمايين‌، بيله‌ ياتسانگ‌ مار بيله‌
ييگريم‌ آلتي‌ كرت‌، يوز مونگ‌ ار بيله‌
قارون‌ خزينه‌سين‌ قولا آلديم‌ توت‌
 
مختومقلي‌ چكسنگ‌ جفا، جبر، بيل‌
خداغا خوش‌ گلر، شكر-صبر بيل‌
قيلچا جانا قيزيل‌ تني‌ قبــــــــــــــر بيل‌
قيزيل‌ تيلينگ‌ سوزلار اكن‌، اولدوم‌ توت‌

تمامی حقوق نزد وبسایت مختومقلی فراغی محفوظ است.
طراحی،توسعه،اجرا: فخرالدین پرویزی